Írsk flugmálayfirvöld eru nú að rannsaka hvort fljúgandi furðuhlutir, sem eru geimför vitsmunavera frá öðrum plánetum, hafi sést við strendur landsins á föstudaginn. Flugmenn tilkynntu þá um skær ljós og fljúgandi furðuhluti við suðvestur strönd landsins.

Þetta hófst klukkan 06.47 þegar flugmaður flugvélar British Airways hafði samband við flugumferðarstjora í Shannon og spurði hvort heræfingar væru á svæðinu því þar væri eitthvað „sem hreyfist svo hratt“. BBC skýrir frá þessu. En flugumferðarstjórinn gat svarað því til að engar æfingar væru í gangi.

Flugmaðurinn, sem var að fljúga frá Montreal í Kanada til Heathrow í Lundúnum, sagðist hafa séð „mjög skær ljós“ og að hluturinn hafi komið upp að vinstri hlið flugvélarinnar áður en hann „breytti um stefnu til norðurs“. Flugmaðurinn sagðist telja að árekstrarhætta hafi ekki verið til staðar.

Flugmaður flugvélar frá Virgin flugfélaginu blandaði sér þá í samtalið og stakk upp á að hér gætu verið loftsteinar eða aðrir hlutir að koma inn í gufuhvolfið því „margir hlutir á sömu braut“ væru þarna og væru þeir mjög skærir. Hann sagðist hafa séð tvö „mjög skær ljós“ hægra megin við flugvélina sem hafi hækkað flugið hratt.

Írsk flugmálayfirvöld segja að í kjölfar tilkynninga frá nokkrum flugvélum um „óvenjulega flugumferð“ sé verið að rannsaka málið.