Það sem af er þessu ári hefur 95 draugabáta rekið upp á japanskar strendur. Yfirleitt er um trébáta að ræða og voru þeir flest mannlausir en í nokkrum fundust lík áhafnarmeðlima. Talið er að bátarnir séu frá Norður-Kóreu.

Japanska strandgæslan hefur umsjón með málum er varða hina svokölluðu draugabáta en það er árvisst að slíka báta reki upp á japanskar strendur. Í fyrra rak 104 slík báta upp í japanskar fjörur og telur strandgæslan að þeir verði fleiri þetta árið.

Það er aðallega á haustin og veturna sem draugabátana rekur á land. Þetta eru yfirleitt gamlir trébátar án siglingabúnaðar. Það sem af er ári hafa 12 lík fundist um borð í bátunum.

Japönsk yfirvöld telja að þetta séu fiskibátar frá Norður-Kóreu en fiskur er ein helsta útflutningsvara Norður-Kóreu til Kína. Talið er líklegt að norður-kóresku sjómennirnir stundi ólöglegar veiðar í japanskri lögsögu og því reki bátana á land í Japan þegar illa fer. BBC skýrir frá þessu.

Því hefur einnig verið velt upp hvort hugsanlega séu kúgaðir Norður-Kóreumenn að flýja land á bátunum. Þessi kenning hefur þó ekki notið mikillar hylli þar sem net og annar búnaður til veiða er yfirleitt um borð í þeim. Auk þess fann japanska strandgæslan 30 lík í svona bátum á síðasta ári og 40 Norður-Kóreubúa sem voru á lífi. Þeir báðu allir um að vera sendir heim aftur og því er talið ólíklegt að verið sé að nota bátana til að reyna að flýja land. Þá væri einnig mun styttra og hættuminna að sigla til Suður-Kóreu.