Aðeins níu prósent Pólverja íhuga nú að yfirgefa ættjörðina í leit að vinnu erlendis. Þetta eru niðurstöður nýrrar könnunar. Blómstrandi efnahagslíf og Brexit eru meðal stærstu þáttanna í þessu. Það virðist því sem það sé að líða undir lok að ungir Pólverjar taki saman föggur sínar og haldi til annarra Evrópuríkja í leit að atvinnu og betra lífi.

Bloomberg skýrir frá þessu en það var pólska starfsmannaleigan Work Service SA sem gerði könnunina. Þetta er fjórða árið sem fyrirtækið gerir könnun sem þessa og aldrei fyrr hefur hlutfall þeirra sem hyggjast leggja land undir fót verið lægra.

Uppgangur í pólsku efnahagslífi, hækkandi laun og bætt lífskjör eiga hér stærstan hlut að máli og valda því að Pólverjar sjá nú í auknum mæli bjarta framtíð fyrir sér í heimalandinu.