Mynd af um það bil 60 menntaskólastrákum hefur verið fordæmd víða, en á henni virðast piltarnir senda nasistakveðju. Myndin var tekin í maí síðastliðnum í Wisconsin í Bandaríkjunum en það var á dögunum sem hún birtist opinberlega og fór sem eldur í sinu um netheima.

Nú hefur maðurinn sem tók myndina stigið fram og komið drengjunum til varnar. Pete Gust er faðir eins af piltunum á myndinni og var það hann sem tók myndina. Hann veit því hvað gekk á áður en myndin var tekin.

Í samtali við AP-fréttastofuna segir Pete að piltanir hafi einfaldlega verið að „vinka foreldrum sínum bless“ áður en þeir héldu á lokaball skólans. Pete segist þó skilja það að myndin hafi farið fyrir brjóstið á mörgum og handabendingar piltanna líti ekki beint vel út.

Aðspurður hvort tilgangurinn hafi verið að senda kveðju að hætti nasista, segir Pete að hann hafi ekki skynjað það þegar myndin var tekin. „Það var ekkert sem gaf það til kynna. Markmiðið var ekki að líkja eftir einu eða neinu og klárlega ekki að móðga neinn.“

Samtök gyðinga gagnrýndu myndina harðlega, þar á meðal Auschwitz-Birkenau-safnið í Póllandi.

Jordan Blue, einn þeirra pilta sem er með hægri höndina niðri á myndinni, segist telja að um vanhugsað grín hafi verið að ræða. Félagar hans hafi sannarlega ætlað að senda nasistakveðju en ekki gert sér grein fyrir alvarleika málsins.