„Þetta er ekkert annað en stórslys,“ segir Chalotte Christansen, hótelstjóri í Ringkøbing í Danmörku en minnst 60 gestir á hótelinu veiktust skyndilega á dögunum.
Fólkið veiktist af nóróveirunni en ekki liggur fyrir hvaðan smitið kom; hvort gestir hafi veikst eftir að hafa borðað á hótelinu eða hvort einhver einn gestur hafi smitað hina.
Nóróveiran getur verið svæsin en henni geta fylgt uppköst, niðurgangur, höfuðverkur, kviðverkir, beinverkir og hiti. Sem betur fer gengur sjúkdómurinn yfir á einum til tveimur dögum yfirleitt.
„Við viljum bara að fólk geti farið ánægt héðan,“ segir Chalotte í samtali við TV Midwest í Danmörku. Sjálf segist hún ekki telja að matnum á hótelinu sé um að kenna en þó er ekki hægt að útiloka það.
