Aðalsaksóknari Sádi-Arabíu fer fram á dauðarefsingu yfir fimm embættismönnum sem grunaðir eru um morðið á blaðamanninum Jamal Khashoggi á ræðisskrifstofu Sáda í Tyrklandi í október síðastliðnum.
Saksóknarinn, Saud Al-Mojeb, sagði blaðamönnum í Riyadh, höfuðborg Sádi-Arabíu, í morgun að krónprinsinn Mohammad Bin Salman væri ekki grunaður um aðild að morðinu.
Sagði Al-Mojeb að fimmmenningarnir hefðu lagt á ráðin um morðið þann 29. september síðastliðinn, eða þremur dögum áður en Khashoggi var myrtur.
Tuttugu og einn er í haldi í Sádi-Arabíu vegna gruns um aðild að morðinu. Af þeim hafa ellefu verið ákærðir og munu þar af leiðandi þurfa að svara til saka.