Maðurinn hefur játað að hafa ráðist á 24 ára nágrannakonu sína. Hann hafði öxi, skrúfjárn, breitt límband og plastspennur meðferðis þegar hann braust inn til hennar og misþyrmdi. Hann batt hendur hennar saman með plastpennunum eftir að hafa slegið hana svo hún missti meðvitund. Hann neitar hins vegar að hafa ætlað að myrða og pynta 16 manns til viðbótar en nöfn þeirra voru á fyrrgreindum dauðalista. Meðal þeirra nafna sem voru á listanum var nafn Anne Marie Roum Svendsen, lögreglustjóra í Álaborg, og tveggja barna hennar.
Hinn ákærði er fyrrum lyftingamaður og er enn í mjög góðu formi að sögn Ekstra Bladet. Lögreglan telur hann mjög hættulegan og gæta átta lögreglumenn hans í réttarsalnum.
Lögreglan telur að henni hafi tekist að koma í veg fyrir að maðurinn gæti látið áætlanir sínar um ofbeldi og morð ná fram að ganga með því að handtaka hann eftir fyrstu árásina. Honum er lýst sem geðsjúkum ofbeldismanni.
Fyrir rétti hefur komið fram að hann sé árásargjarn og hafi áður verið stórnotandi á hassi og kókaíni. Í tölvu hans fann lögreglan mikið af myndböndum sem sýna raunverulegar afhöfðanir og hrottalegt kynferðisofbeldi gegn konum.
„Mér fannst gaman að horfa á myndir þar sem fólk deyr. Í mínum augum var það ekki klám heldur hryllingsmynd.“
Sagði hinn ákærði fyrir dómi. Þegar saksóknari spurði hann hvort hann örvaðist kynferðislega við að sjá fólk afhöfðað sagði hann:
„Nei, auðvitað ekki, það segir sig sjálft. Ég fæ ekkert út úr því kynferðislega að sjá einhvern skorinn á háls.“
Hann sagði að þessi þörf að horfa á ofbeldisefni hafi vaxið samhliða aukinni hassneyslu hans.
Einnig hefur komið fram fyrir dómi að maðurinn hafði skrifað einhverskonar stefnuyfirlýsingu þar sem hann lýsti hugmyndum sínum um að drepa fólk, sem hann þekkir, og beita það hrottalegu ofbeldi og kynferðisofbeldi. Hann segir þetta vera eintóman skáldskap og hann hafi ekki ætlað að láta verða af þessu.