Grænlenski landlæknirinn, Henrik Hansen, segir að það verði að taka mjög alvarlega að fimm ungar manneskjur hafa smitast af HIV á Grænlandi að undanförnu. Fólkið er á aldrinum 20 til 40 ára. Hann hefur sérstakar áhyggjur af að hér er um ungt fólk að ræða því það á að jafnaði fleiri rekkjunauta en þeir sem eldri eru og því sé jafnvel hætta á enn meiri útbreiðslu veirunnar.

KNR hefur eftir honum að málið sé mjög alvarlegt því fimm smit séu mjög mikið í grænlensku samhengi. Mikill áróður hefur verið rekinn fyrir notkun smokka á Grænlandi og smokkum er dreift ókeypis til fólks en samt sem áður virðast margir láta hjá líða að nota þá. En það er ekki aðeins HIV sem færist í aukana því sárasóttartilfellum hefur einnig fjölgað.

Hansen telur að sárasóttartilfellin verði langt yfir 100 á árinu og hann óttast að HIV geti breiðst út á álíka hátt.