Kjöt, sælgæti, leikföng, fatnaður og raftæki hafa lækkað í verði á milli ára. Flugmiðar og rekstrarkostnaður bíla hefur hins vegar hækkað á sama tíma. Þegar þetta er allt gert upp þá hækkaði verðlag í Danmörku um 0,8% prósent frá október á síðasta ári þar til í október á þessu ári. Þetta er lítil hækkun að mati margra hagfræðinga og þá ekki síst í ljósi þess að laun hækkuðu að meðaltali um 2,6% prósent á tímabilinu. Launin standa því undir töluvert meiri neyslu en áður. Þetta er eflaust eitthvað sem margir Íslendingar hefðu ekkert á móti að sjá meira af.

Danska ríkisútvarpið skýrir frá þessu. Fram kemur að matarverð hafi lækkað um 0,8% á tímabilinu. Til dæmis hefur verð á svínakjöti lækkað um 3,4% en einnig lækkaði verð á kjúklingum, kartöflum og súkkulaði á tímabilinu. Haft er eftir Las Olsen, hagfræðingi, að þetta hafi komið honum á óvart, sérstaklega í ljósi þess að landbúnaðurinn hafi glímt við mikla erfiðleika vegna mikilla þurrka í sumar.

Verðbólgan á tímabilinu mældist 0,7% en í ESB var hún að meðaltali 2,1%. Olsen segir að ástæðan sé að Danir verði fyrir minni áhrifum en aðrar þjóðir af hækkandi olíuverði því þeir noti minna bensín en aðrar þjóðir og lítið sé um að olía sé notuð til kyndingar. Bensínverð hækkaði þó um 9,5% á tímabilinu en það skýrir hærra verð á flugferðum.

Olsen sagði að þetta væru í heildina góð tíðindi en það verði þó að hafa þann fyrirvara á að Danir séu að jafnaði skuldsettari en nágrannar þeirra í Evrópu.