Dominic Raab, Esther McVey og Shailesh Vara hafa sagt af sér ráðherradómi í Bretlandi. Ástæðan er yfirvofandi úrsögn Breta úr Evrópusambandinu og samningsdrög þar að lútandi sem nú liggja fyrir.

Fyrstur til að ríða á vaðið var Shailesh Vara, ráðherra málefna Norður-Írlands, en Vara var einn þeirra sem kaus gegn útgöngu Breta úr Evrópusambandinu. Í morgun fylgdu svo tveir ráðherrar í fótspor hans; Esther McVey, sem fer með atvinnumál í bresku ríkisstjórninni, og Dominic Raab sem fór með Brexit-málin.

Ráðherrarnir eru ósáttir við samningsdrögin og það hvernig útgöngu Breta úr ESB verður háttað. Raab og McVey segjast ekki geta setið áfram með góðri samvisku og segja að ESB sé að kúga Bretland til hlýðni. Sagði McVey að Theresa May, forsætisráðherra Bretlands, væri með drögunum að ganga gegn úrslitum þjóðaratkvæðagreiðslunnar um útgöngu Breta úr Evrópusambandinu.

Ljóst er að Theresa May er í vanda stödd en hún hefur látið hafa eftir sér að hún hafi tekið réttar en jafnframt erfiðar ákvarðanir.