Eduoard Fritch, forseti Frönsku Pólýnesíu, hefur viðurkennt að yfirvöld þar hafi logið blákalt að þegnum sínum um afleiðingar kjarnorkutilrauna við eyjaklasann í Suður-Kyrrahafi.

Franska Pólýnesía er á frönsku yfirráðasvæði og á árunum 1960 til 1996 stunduðu Frakkar miklar kjarnorkutilraunir. Alls voru sprengdar 193 sprengjur á svæði við eyjarnar.

„Ég er ekki hissa að ég hafi verið kallaður lygari í 30 ár. Við lugum að íbúum að þessar tilraunir væru öruggar og afleiðingarnir yrðu engar,“ sagði Fritch á fimmtudag. Yfirvöld í Frakklandi hafa ekki viljað tjá sig um málið.

Árið 2010 samþykktu frönsk stjórnvöld að greiða yfirvöldum í Frönsku Pólýnesíu fleiri milljónir evra í bætur vegna kjarnorkutilraunanna.

Bruna Barrillott, uppljóstrari sem varpaði ljósi á afleiðingar tilraunanna á sínum tíma, lést á síðasta ári en það var hann sem benti á aukna tíðni hvítblæðis og skjaldkirtilskrabbameins meðal íbúa.

Árið 2016 viðurkennti Francois Hollande Frakklandsforseti að kjarnorkutilraunirnar hefðu haft afleiðingar í för með sér fyrir íbúa á svæðinu en hrósaði jafnframt yfirvöldum í Frönsku Pólýnesíu. Sagði hann að yfirvöld þar hefðu lagt grunninn að sterkri stöðu Frakka sem eins af kjarnorkuveldunum níu.