Yfirvöld í Kaliforníu hafa staðfest að 71 lík hafi fundist á hamfarasvæðunum í Kaliforníu þar sem miklir skógareldar geisa. Þá hefur tala þeirra sem saknað er hækkað úr 631 í rúmlega 1.000. Kory Honea, lögreglustjóri í Butte sýslu, skýrði frá þessu í gærkvöldi. Hann tók fram að ekki væri víst að allir á listanum væru týndir heldur hefði fólk bjargað sér frá eldhafinu en hafi ekki látið yfirvöld vita og viti ekki að þeirra er „saknað“.

9.700 hús og 144 fjölbýlishús eyðilögðust í eldhafinu í bænum Paradise, þar sem 27.000 manns bjuggu, og í nágrannabæjunum Magalia og Concow.

Slökkviliðsmönnum hefur orðið betur ágengt í baráttunni við eldana undanfarnar klukkustundir en undanfarna daga og telja sig nú hafa stjórn á um 45% þeirra.

Fjöldi manna leitar að líkamsleifum í brunarústum á hamfarasvæðunum sem eru víða í Kaliforníu. Þetta er mannskæðasti skógareldurinn í Bandaríkjunum í eina öld hið minnsta.

Donald Trump, forseti, heimsækir hamafarasvæðin í dag og ætlar að ræða við íbúa. Ekki er víst að allir taki honum opnum örmum eftir ummæli hans á Twitter nýlega þar sem hann sagði að lélegri stjórn skógræktarmála væri um að kenna að eldarnir hefðu kviknað og náð svona mikilli útbreiðslu. Hann hótaði einnig að stöðva greiðslur alríkisins til Kaliforníu vegna þessa.