Barnard‘s Star b er að minnsta kosti 3,2 sinnum stærri en jörðin en yfirborðshitinn á henni er talin vera 150 gráður í mínus. Þetta er vegna þess að stjarnan, Barnard‘s Star, gefur litla birtu frá sér eða um 3% af því sem sólin okkar gefur frá sér.
Þrátt fyrir þetta telja vísindamen að undir ísilögðu yfirborðinu sé fljótandi vatn og þar sé hugsanlega hitavirkni þar sem heitt jarðhitavatn streymir út í vatnið. Að þeirra mati er ekki óhugsandi að líf sé að finna í þessu vatni. Niðurstöður rannsóknarinnar hafa verið birtar í vísindaritinu Nature.
Carole Haswell, sem vann að rannsókninni, segir að líklegast sé hitastigið á Barnard‘s Star b svipað og er á Evrópu sem er eitt tungla Júpiters. Á Evrópu sé vatn þar sem talið sé að líf geti þrifist, ekki sé útilokað að svipaðar aðstæður séu uppi á Barnard‘s Star b.
En þótt það séu aðeins sex ljósár til Barnard‘s Star b þá mun það taka okkur rúmlega 100.000 ár að komast þangað með þeirri tækni sem við búum yfir í dag. Við munum því ekki skjótast þangað til að kanna aðstæður á næstunni.