Bandarísk löggæsluyfirvöld hafa haft hendur í hári 35 ára karlmanns, Oscar Davila Rodriguez. Oscar þessi var ákærður fyrir morð á fyrrverandi kærustu sinni, Nydiu Maldonado, sem var stungin á heimili sínu í McAllen í Texas árið 2005.

Oscar var talinn hafa brotist inn á heimili hennar þar sem hann lagði til hennar með hníf og kyrkti hana. Meðan málið var til meðferðar fyrir dómstólum fékk Oscar sig lausan gegn 100 þúsund dala tryggingu og rétt áður en kveða átti upp dóm árið 2008 lét hann sig hverfa. Að Oscari fjarstöddum var dómur engu að síður kveðinn upp og var niðurstaðan 40 ára fangelsi.

Þrátt fyrir eftirgrennslan lögreglu spurðist ekkert til Oscars og taldi lögreglan að hann hefði komist úr landi. Sá grunur reyndist á rökum reistur því hann var handtekinn á dögunum í Mexíkó og framseldur til Bandaríkjanna.

Saksóknaraembættið í Hidalgo-sýslu segir að þrotlaus vinna lögreglu hafi skilað því að Oscar var handtekinn. Ekki kemur fram í tilkynningu embættisins hvernig lögreglan komst á snoðir um dvalarstað hans í Mexíkó.