Feticu fann málverkið á laugardaginn, 10 dögum eftir hún fékk ábendinguna. Því hafði verið pakkað inn í plast og Feticu og blaðamaður sem var í för með henni afhentu yfirvöldum málverið strax til að hægt væri að skera úr um hvort hér væri hið upprunalega málverk komið en verðmæti þess er um 800.000 evrur.
Fréttin um þetta fór eins og eldur í sinu um heimsbyggðina og vakti að vonum mikla athygli. En nú eru komnar fram nýjar upplýsingar sem benda til að ekki hafi verið um upprunalega málverkið að ræða. Feticu fékk tölvupóst á sunnudaginn frá belgískum leikstjóra sem sagði að allt hefði þetta verið hluti af verkefninu True Copy sem fjallar meðal annars um gildi sannleikans. Verkefnið hefur að sögn verið í gangi í tvö ár en það er helgað hinum alræmda Geert Jan Jansen, sem seldi fjölda falsaðra listaverka sem upprunaleg væru, þar á meðal eftir Picasso og Klimt. Endi var bundinn á þessa iðju hans 1994 þegar hann var handtekinn en áður hafði hann selt mikinn fjölda málverka.
Á heimasíðu verkefnisins kemur fram að það hafi verið undirbúið leynilega undanfarna mánuði með það að markmiði að finna umrætt málverk. Einnig kemur fram að ekki verði veittar frekari upplýsingar um málið fyrr en það hefur verið rætt við Feticu og blaðamanninn sem var í för með henni.
Málverkinu var stolið ásamt sex öðrum úr listasafni í Rotterdam 2012. Ránið tók aðeins þrjár mínútur. Tveimur árum síðar voru fjórir handteknir vegna málsins og voru þeir krafðir um 18 milljónir evra í bætur fyrir málverkin. Málverkin hafa aldrei fundist og óttast er að þau hafi verið eyðilögð.
