Fjórir létust í skotárás á og við sjúkrahús í Chicago í gærkvöldi. Atburðarásin hófst fyrir utan sjúkrahúsið þar sem árásarmaðurinn skaut unnustu sína, sem var læknir á sjúkrahúsinu, til bana á bifreiðastæðinu. Bandarískir fjölmiðlar segja að þau hafi ætlað að gifta sig í október en hún hafi slegið því á frest í september.

Lögreglumenn umkringdu árásarmanninn á bifreiðastæðinu en hann náði þó að hlaupa inn á sjúkrahúsið þar sem hann skaut konu, starfsmann í apóteki sjúkrahússins, til bana. Hann skaut einnig lögreglumann til bana inni á sjúkrahúsinu. Samuel Jiminez var við skyldustörf þar þegar hann var skotinn. Hann hafði starfað sem lögreglumaður í tæp tvö ár og var þriggja barna faðir segir í tilkynningu frá lögreglustjóranum í borginni.

Árásarmaðurinn var skotinn til bana inni á sjúkrahúsinu en ekki hafa enn borist upplýsingar um hvort það voru lögreglumenn sem skutu hann til bana eða hvort hann tók eigið líf.