Ivanka Trump, dóttir Donald Trump Bandaríkjaforseta, er titluð sem ráðgjafi hans og er þar með starfsmaður í Hvíta húsinu. Sem slíkur á hún að notast við netþjóna hins opinbera þegar hún sendir tölvupósta en eins og frægt varð í kosningabaráttu Trump og Hillary Clinton fyrir tveimur árum hafði Hillary notaði sinn eigin netþjón til slíkra sendinga. Þetta hefur Trump gagnrýnt harðlega og margoft sagt að dæma eigi Hillary í fangelsi fyrir þetta. En nú er komið á daginn að Ivanka hefur gert nákvæmlega það sama og Hillary og því er spurningin auðvitað hvað Trump segir núna?
Það var við nýlega yfirferð á tölvupóstum fimm ráðuneyta og stofnana þeirra sem embættismenn ráku augun í að Ivanka hefur notað sinn eigin netþjón til að senda mörg hundruð tölvupósta til starfsmanna Hvíta hússins og til ráðherra og aðstoðarmanna þeirra. Washington Post segir að þetta brjóti gegn opinberum reglum um tölvupósta.
Skoðun embættismanna sýnir að á síðasta ári notaði Ivanka margoft sitt eigið netfang og netþjón, sem hún deilir með eiginmanni sínum Jared Kushner, til að ræða opinber málefni tengd Hvíta húsinu.