Í gær hófust réttarhöld i Senja í Noregi yfir 22 ára konu sem er ákærð fyrir morð í nóvember á síðasta ári. Hún myrti þá 84 ára gamla konu, Gudrun Myrvang Thomassen, á heimili hennar í Lenvik í Troms. Unga konan þjáðist af ranghugmyndum og taldi að Gudrun væri norn. Áður hafði hún haft í hótunum við ættingja sína.

TV2 skýrir frá þessu. Lögreglunni var tilkynnt um hótanir konunnar í garð ættingja sinna og voru lögreglumenn þá sendir heim til hennar. Þegar þeir komu þangað sáu þeir blóð á dyrum nágrannans, Gudrun Myrvang. Inni í íbúð hennar fundu þeir gömlu konuna helsærða en hún hafði verið stungin mörgum stungum. Hún lést skömmu eftir að lögreglumennirnir komu á vettvang.

Hin ákærða var í íbúð gömlu konunnar og var handtekin. Fyrir dómi kom fram að konan hafi þjáðst af ranghugmyndum og hafi verið í geðrofi á þeirri þegar hún myrti Gudrun. Hún taldi að Gudrun væri norn og hafði reynt að kveikja í henni áður en lögreglumenn komu á vettvang.

Konan hefur verið vistuð á geðdeild í Tromsø síðan hún var handtekin. Saksóknari segist ætla að krefjast þess að hún verði dæmd til vistunar á geðdeild.