Bandarískur trúboði, John Allen Chau, 27 ára, var skotinn til bana með örvum eftir að hann reyndi að nálgast afskekktan ættbálk á eyju í Indlandshafi.

Ættbálkurinn sem um ræðir er mjög afskekktur og býr á eyjunni North Sentinel í Andaman-eyjaklasanum. BBC greindi frá þessu í morgun.

Allen þessi er sagður hafa verið kristniboði og er hann sagður hafa freistað þess að boða kristna trú í samfélaginu sem hefur engin samskipti við umheiminn. Chau er sagður hafa fengið sjómenn til að fara með sig á eyjuna en þegar sjómennirnir sneru til baka komu þeir að honum látnum í flæðarmálinu. Létu íbúar örvum rigna yfir hann með fyrrgreindum afleiðingum.

Talið er að meðlimir ættbálksins séu um 150 talsins og nýtur hann verndar. Þannig er fólki ekki leyfilegt að stíga fæti á eyjuna og þá má fólk ekki eiga samskipti við meðlimi. Allt er þetta gert í þeim tilgangi að tryggja varðveislu ættbálksins og til að minnka líkurnar á að sjúkdómar geri út af við meðlimi hans. Þá hafa stjórnvöld í Indlandi lagt blátt bann við að myndir séu teknar af meðlimum. Þeir sem brjóta gegn þeim ákvæðum geta átt yfir höfði sér þriggja ára fangelsi.

Ekki er heldur hægt að sækja meðlimi ættbálksins til saka og því verður ekki refsað fyrir morðið á trúboðanum.

Sjö sjómenn hafa verið handteknir fyrir að aðstoða Allen við að komast að eyjunni.