Paul Gonzales, 45 ára karlmaður í Los Angeles-sýslu í Bandaríkjunum, fer seint í metabækurnar fyrir herramennsku sína. Gonzales komst í fréttirnar fyrir skömmu þegar greint var frá óvenjulegri ákæru á hendur honum.

Gonzales þessi stundaði það nefnilega að bjóða konum á stefnumót á fín veitingahús. Þegar búið var að borða sagðist Gonzales þurfa að bregða sér afsíðis, ýmist á salerni eða í símann. Greip hann tækifærið og stakk af frá reikningnum. Gerði hann þetta í að minnsta kosti þrígang.

Nú hefur dómur í málinu verið kveðinn upp og eflaust getur Gonzales huggað sig við það að fá áfram ókeypis máltíðir. En í þetta skiptið getur hann ekki stungið af frá reikningnum. Dómari dæmdi hann í 120 daga fangelsi fyrir brot sín.

Brotin áttu sér stað á tímabilinu maí 2016 og fram í apríl 2018 en reikningarnir sem Gonzales stakk af frá námu yfirleitt rúmum 100 dollurum. Konunum kynntist hann með aðstoð stefnumótaforrita eins og Bumble, en í dómnum var Gonzales bannað að nota þesskonar þjónustur næstu þrjú árin.