Grábjörn varð 37 ára konu og tíu mánaða dóttur henni að bana í Júkon, sjálfstjórnarsvæði í norðvesturhluta Kanada, á dögunum. Átti harmleikurinn sér stað við fjallakofa við Einarson-vatn.
Í frétt Yukon News kemur fram að Gjermund Roesholt, eiginmaður og faðir hinna látnu, hafi verið í veiðiferð á svæðinu. Þegar hann var að snúa heim mætti hann grábirninum skammt frá heimili sínu og skaut hann til dauða. Hann kom svo að eiginkonu sinni, Valérie Théoret, og dóttur sinni, Adele, látnum fyrir utan kofann.
„Það lítur þannig út að þær hafi verið í gönguferð þegar björninn réðist á þær,“ segir lögreglumaður á svæðinu.
Théoret var í barneignarleyfi en hún starfaði sem kennari við Whitehorse-gagnfræðaskólann.