Þrettán eru látnir eftir að byssumaður hóf skothríð á veitingastað í Kaliforníu. Árásin átti sér stað um miðnætti að bandarískum tíma en snemma í morgun að íslenskum tíma.
Byssumaðurinn fannst látinn inni á veitingastaðnum, en talið er að lögreglumönnum hafi tekist að skjóta hann til bana. Manninum tókst að skjóta minnst tólf manns til bana en á meðal þeirra sem létust er lögreglumaður. Tólf eru sagðir vera slasaðir.
Árásin átti sér stað í Thousand Oaks sem er næststærsta borgin í Ventura-sýslu í Kaliforníu. Undanfarin ár hefur borgin verið talin meðal þeirra öruggustu í Bandaríkjunum hvað glæpatíðni varðar.
Árásin átti sér stað á veitingastaðnum Borderline Bar & Grill en á þessari stundu liggja frekari upplýsingar um byssumanninn ekki fyrir.
Borderline Bar & Grill hefur notið nokkurra vinsælda meðal ungs fólks en í gærkvöldi var einmitt haldin samkoma fyrir menntaskólanemendur á staðnum. Barinn er skammt frá California Lutheran University og er talið að nemendur úr skólanum hafi verið á staðnum þegar árásin var framin.