Þetta fór illa fyrir brjóstið á mörgum íhaldssömum Suður-Kóreubúum. Þess utan er klám með öllu bannað í Suður-Kóreu. En það sem þótti verst var að hljómsveitin, sem og margar álíka stúlknahljómsveitir, njóta mikilla vinsælda meðal ungra stúlkna og unglingsstúlkna. Þar sjá þær fyrirmyndir sínar.
Honey Popcorn er mjög vinsæl í Asíu og hefur verið í nokkur misseri en hljómsveitin flytur „hefðbundið“ skólastúlku popp/danslög.
Það vakti reiði í Suður-Kóreu að þessar fyrirmyndir unglingsstúlkna eru jafnframt klámstjörnur og það varð til þess að í mars varð hljómsveitin að hætta við að koma fram á skipulagðri samkomu aðdáenda sveitarinnar. Rúmlega 35.000 manns skrifuðu undir áskorun til forseta landsins um að banna allt sem tengist Honey Popcorn. Stjórnvöld aðhöfðust ekkert en þrýstingurinn var svo mikill að hljómsveitin neyddist til að hætta við að mæta á svæðið. Að lokum tókst hljómsveitinni þó að komast til Suður-Kóreu og troða upp fyrir aðdáendur sína. Af siðferðislegum ástæðum var aldurstakmark á tónleikana 19 ár og miðarnir voru ansi dýrir. Óttast var að til mótmæla kæmi utan við tónleikahöllina en það varð ekki raunin. Á sviðinu flutti Honey Popcorn hefðbundið japanskt/kóreskt smástúlkupopp þar sem er sungið, dansað, glæsilegir búningar og almennt sakleysi ríkjandi.
En þetta er í ákveðinni mótsögn við það myndefni sem er hægt að finna á internetinu með hljómsveitarmeðlimunum þremur. Þær reyna heldur ekki að fela fortíð og nútíð sína sem klámmyndaleikkonur. Á tónleikunum í Seoul sagði leiðtogi hljómsveitarinnar, Mikami Yua:
„Ég starfa við framleiðslu fullorðinsmyndbanda í Japan. Það tel ég vera alvöru vinnu eins og að vera í hljómsveitinni en nú vil ég aðallega einbeita mér að því að kynna Honey Popcorn.“