Eins og DV hefur skýrt frá tóku eyjaskeggjar á móti Chau með örvadrífu og bundu síðan band um háls hans og drógu hann eftir ströndinni en þessar upplýsingar eru frá sjómönnum sem fluttu hann til eyjunnar.
Samkvæmt frétt Hindustan Times hefur lögreglan nú áhuga á að ná tali af dularfulla bandaríska pari sem er talið hafa aðstoðað Chau á Indlandi og hafi hitt hann margoft áður en hann fór til North Sentinel. Einnig kemur fram að Chau hafi smyglað tösku í land á eyjunni nóttina áður en hann fór síðan aftur í land til að hitta eyjaskeggja.
Vitað er að Chau hafði tvisvar áður farið til eyjunnar en lagði á flótta þegar eyjaskeggjar skutu á hann. Samkvæmt frétt Hindustan Times segja sjómennirnir, sem fluttu hann til eyjunnar, að hann hafi farið í land aðfaranótt 17. nóvember og skilið tösku eftir. Í henni var vegabréf hans, fatnaður, skyndihjálparbúnaður og vítamíntöflur.
Áætlun hans gekk út á að eyjaskeggjar myndu taka á móti honum og sætta sig við hann næsta morgun. Hann ætlaði síðan að dvelja á eyjunni mánuðum saman. Þegar hann fór síðan í land um morguninn var hann aðeins í nærbuxum til að líkjast eyjaskeggjum sem mest. Hann ætlaði síðan að sýna íbúunum innihald töskunnar þegar hann hefði unnið traust þeirra. Lögreglan segist ekki vita hvað varð um töskuna, hugsanlega hafi eyjaskeggjar fundið hana og tekið hana eða eyðilagt.
Bandaríska parið eru að sögn heimildarmanna Hindustan Times 25 ára karlmaður frá Colorado og 53 ára kona frá Tennessee. Í dagbók sína skrifaði Chau um fundina með þeim og sagði fundarstað þeirra vera „öruggt hús“. Lögreglan veit hvaða hús er um að ræða og hefur yfirheyrt eiganda þess en bandaríska parið fór úr því 10. nóvember. Lögreglunni hefur ekki tekist að hafa uppi á parinu.