Borgaryfirvöld í Norfolk í Virginíu í Bandaríkjunum hafa fallist á að greiða fjórum skipverjum, sem sakaðir voru um hryllilega glæpi árið 1997, milljónir í bætur.

Mennirnir; Eric Wilson, Danial Williams, Joe Dick og Derek Tice voru sakfelldir fyrir morð og nauðgun á ungri konu, Michelle Moore-Bosko. Þeir voru sakfelldir í málinu árið 1999 og voru þrír mannanna; Tice, Williams og Dick dæmdir í lífstíðarfangelsi. Wilson var dæmdur í rúmlega átta ára fangelsi fyrir sinn þátt í ódæðinu.

Það var svo ekki fyrr en árið 2016 að dómari komst að þeirri niðurstöðu að fyrirliggjandi sönnunargögn í málinu bentu til þess að fjórmenningarnir hefðu hvergi komið nálægt morðinu. Mennirnir voru náðaðir af ríkisstjóra Virginíu á síðasta ári og nú hafa borgaryfirvöld í Norfolk samþykkt að greiða mönnunum 4,9 milljónir dala í bætur og þá fá þeir 3,5 milljónir dala frá Virginíuríki.

Það var sumarið 1997 sem eiginmaður Michelle kom að henni látinni í íbúð þeirra í Norfolk. Eiginmaðurinn var sjóliði í bandaríska hernum og hafði verið á sjó í rúma viku. Williams bjó í sömu byggingu og hjónin og var lögregla fljót að beina sjónum sínum að honum þar sem hann hafði reynt við Michelle skömmu fyrir morðið. Williams játaði glæpinn á sig en síðar kom í ljós að um þvingaða játningu var að ræða. Það sama átti við í tilvikum hinna mannanna sem voru vinir Williams.

Fimmti maðurinn var síðar sakfelldur, Omar Ballard, en DNA-sýni frá honum fannst á vettvangi morðsins. Hann játaði sök árið 2000 og sagðist hafa verið einn að verki þegar hann nauðgaði og myrti Michelle.