The Mail on Sunday skýrir frá þessu. Fram kemur að leyniþjónustur hafi hlerað samtöl háttsettra liðsmanna IS. Samtökin hafi fengið aukinn áhuga á árásum sem þessum í kjölfar morðtilræðis Rússa við Sergei Skripal og dóttur hans Yulia Skripal í Salisbury í mars.
Áður en sú árás var gerð taldi greiningardeild bresku ríkisstjórnarinnar fjórðungslíkur á að öfgasinnaðir íslamistar myndu gera efnavopnaárás á Bretlandseyjum. Nú eru líkurnar taldar vera rúmlega 50 prósent. Hafa yfirvöld sérstakar áhyggjur af því að sprengjur verði sprengdar í neðanjarðarlestarkerfi Lundúnaborgar. Hættan á þessu er talin svo mikil að stjórnendur leyniþjónustustofnana funduðu nýlega með yfirmönnum lögreglu og annarra björgunarliða í borginni um viðbrögð við slíkum árásum. Einnig fóru fram skrifborðsæfingar á viðbrögðum við árásum á tvær lestarstöðvar samtímis.