Það var síðan með nýrri DNA-tækni sem lögreglunni tókst að leysa málið og fá Bishop dæmdan. Í umfjöllun Sky kemur fram að húðflaga af honum hafi fundist á líki annarrar stúlkunnar. Líkurnar á að þetta gerðist og að húðflaga með erfðaefni Bishop fyndist á stúlkunum var einn á móti milljarði að sögn Sky. Húðflagan fannst á vinstri framhandlegg Karen og hafði verið geymd í öll þessi ár sem sönnunargagn. Með nýrri tækni tókst síðan að finna erfðaefni Bishop í henni.
Russel misþyrmdi stúlkunum kynferðislega og kyrkti þær síðan og faldi lík þeirra í skógi. Bishop var einn þeirra sem komu að líkum stúlknanna þegar þau fundust en hann hafði slegist í för með tveimur mönnum sem leituðu þeirra. Í yfirheyrslum 1986 og aftur 2016, þegar hann hafði verið handtekinn á nýjan leik vegna málsins, varð hann margsaga um hvort hann hefði snert lík stúlknanna eftir að hann og mennirnir tveir komu að þeim.
Þegar honum var kynnt niðurstaða DNA-rannsóknarinnar sagðist hann hafa þreifað á púls hjá Karen til að kanna hvort hún væri á lífi.
Lögreglan vildi vera alveg viss um að Bishop myndi ekki vera sýknaður aftur og fékk því færustu sérfræðinga Bretlands til liðs við sig við DNA-rannsóknirnar.
Fyrir dómi kom einnig fram að Bishop rændi þriðju ungu stúlkunni 1989 og nauðgaði henni og reyndi að drepa. Hann situr enn í fangelsi vegna þessa máls. Enn á eftir að ákveða refsingu hans fyrir morðin á Karen og Nicola en öruggt þykir að hann sleppur aldrei úr fangelsi.