Skömmu fyrir lendingu flugvélar frá Precision Air í Mwanza í Tansaníu á sunnudaginn flaug vélin inn í stóran fuglahóp. Það varð blóðugur árekstur þar sem  margir fuglar drápust en þeir lentu á nefi vélarinnar, lendingarbúnaði, hreyflum og framrúðunni sem var blóði þakin á eftir eins og sjá má á meðfylgjandi myndum.

Um borð í vélinni vour 68 farþegar og 4 manna áhöfn. Enginn meiddist og flugmönnum tókst að lenda vélinni áfallalaust þrátt fyrir að útsýnið úr flugstjórnarklefanum væri með verra móti.

Vélin er af gerðinni ATR 72-500. Eins og venja er þegar svona gerist var vélin tekin í nákvæma skoðun af flugvirkjum áður en hægt var að fljúga henni á nýjan leik.