Það var mikill æsingur í breska þinginu þegar Jeremy Corbyn, leiðtogi Verkamannaflokksins, sótti hart að Theresu May, forsætisráðherra og leiðtoga Íhaldsflokksins. Hasarinn var svo mikill að John Bercow, forseti þingsins, þurfti að grípa fram í, reyndar ekki í fyrsta sinn, og biðja þingmenn að róa sig. Í dag fer fram atkvæðagreiðsla í þinginu um samning Breta við Evrópusambandið og vantrauststillaga þingmanna Íhaldsflokksins á May.

Mikil óánægja er innan raða þingmanna Íhaldsflokksins með hvernig May hefur haldið á spilunum varðandi útgöngu Bretlands úr Evrópusambandinu, Brexit, en ljóst er að samningur hennar við ESB um útgönguna nýtur ekki meirihlutastuðnings á þingi. Framtíð May er því að veði í atkvæðagreiðslunni í dag, hún hét því í ræðu í morgun að hún ætlaði að berjast gegn vantrauststillögu samflokksmanna á þinginu með „öllu sem hún hefur“ og hefur hún fengið stuðning frá David Cameron, forvera sínum, til að koma því til skila til þingmanna sinna að ef hún færi frá yrði það aðeins vatn á myllu Corbyn.

Corbyn gagnrýndi hana svo harðlega í spurningatíma á þinginu í dag. Hann sagði að ekkert hefði breyst þrátt fyrir endalausa fundi með leiðtogum í Evrópu. May svaraði á móti að Corbyn hefði engan áhuga á að ná góðu samkomulagi, það eina sem hann vildi væri að skapa efnahagslegan glundroða. Corbyn sagði á móti að tími tafa og þvaðurs væri liðinn, hún þyrfti samningur May að fara í atkvæðagreiðslu á þinginu.