Theresa May, forsætisráðherra Bretlands, ætlar að berjast gegn vantrauststillögu samflokksmanna á þinginu með „öllu sem hún hefur“. Líkt og Pressan greindi frá í morgun lýstu 48 þingmenn breska Íhaldsflokksins yfir vantrausti á May, forsætisráðherra, og munu þingmenn flokksins greiða atkvæði um tillöguna síðdegis í dag.
Mikil óánægja er innan raða þingmanna Íhaldsflokksins með hvernig May hefur haldið á spilunum varðandi útgöngu Bretlands úr Evrópusambandinu, Brexit, en ljóst er að samningur hennar við ESB um útgönguna nýtur ekki meirihlutastuðnings á þingi. Framtíð May er því að veði í atkvæðagreiðslunni í dag og Brexit er vægast sagt í lausu lofti og enginn sem veit hvernig útgangan mun fara fram.
May hélt ræðu fyrir framan fjölmiðla fyrir utan Downingstræti í morgun. Hún sagði að ef hún færi frá og það færi af stað valdabarátta í flokknum þýddi það margra vikna átök sem yrðu bara til þess að styrkja Jeremy Corbyn og Verkamannaflokkinn. Ef Íhaldsflokkurinn skipti um leiðtoga væri verið að „leggja framtíð landsins í hættu og skapa óvissu þegar landið þurfi síst á henni að halda“.
