Lítið gat á rússnesku Soyuz-geimfari var mögulega borað í skrokk geimfarsins eftir að það kom til Alþjóðlegu geimstöðvarinnar síðsumars. Rannsókn á málinu stendur nú yfir og er ekki útilokað að bandarískir geimfarar hafi reynt vísvitandi að skemma geimfarið.

Það var þann 30. ágúst síðastliðinn að geimfarar urðu varir við að loft læki úr farinu. Þetta var tveimur mánuðum eftir að farið kom til Alþjóðlegu geimstöðvarinnar. Þó gatið hafi verið lítið, aðeins um tveir millímetrar, þurfa geimför að uppfylla ströng öryggisskilyrði og jafnvel minnsti galli getur verið mjög alvarlegur. Því er þetta tiltekna mál litið alvarlegum augum og er það nú skoðað hvort um galla í framleiðslu hafi verið að ræða eða hvort um skemmdarverk hafi verið að ræða.

Dmitry Rogozin, yfirmaður Roscosmos, rússnesku geimferðarstofnunarinnar, hefur raunar útilokað að um galla hafi verið að ræða. Í frétt News.com.au í Ástralíu kemur fram að ýmsum kenningum hafi verið varpað fram; þannig hafi bandarískir geimfarar mögulega borað gatið til að koma veikum kollega sínum aftur til jarðar.

Það var á dögunum að rússnesku geimfarirnar komust að gatinu og skáru þeir stykki úr skrokki farsins sem verður sent til rannsóknar á jörðu niðri. Á rannsóknin að leiða í ljós hvort gatið hafi verið borað úti í geimnum eða hvort um galla sé að ræða.

Tveir geimfarar lögðu í vikunni upp í talsverða hættuför til að komast að gatinu. Ekki er gert ráð fyrir því í hönnun Soyuz-geimfarsins að geimfarar geti farið í geimgöngur og lagað það sem hugsanlega er að í skrokki þess. Þannig eru engin handrið eða þar til gerður öryggisbúnaður fyrir geimfara og því þurftu þeir að vanda mjög til verka.

Rogozin sagði í október síðastliðnum að ekki hefði verið um galla í hönnun geimfarsins að ræða og í kjölfarið vörpuðu rússneskir fjölmiðlar fram þeirri kenningu að bandarískir geimfarar hefðu átt við það. Rússnesk yfirvöld neituðu því í kjölfarið en nú hefur Rogozin ekki viljað útiloka neitt. Mun rannsóknin á stykkinu sem geimfararnir tóku líklega leiða málið til lykta.

Þó að grunnt hafi verið á góðu milli Rússa og Bandaríkjamanna hefur samstarfið í Alþjóðlegu geimstöðinni gengið vel hingað til.