Þeim sem deyja í Bandaríkjunum eftir að hafa tekið of stóran skammt af fíkniefnum hefur farið hratt fjölgandi á undanförnum árum og má að einhverju leyti rekja það til vaxandi vinsælda einnar ákveðinnar og stórhættulegrar tegundar.
Hér er um að ræða ópíóíðalyfið Fentanyl en nýbirtar tölur frá Bandaríkjunum sýna að 18.335 manns dóu árið 2016 eftir að hafa tekið of stóran skammt af lyfinu. Ekkert eitt fíkniefni dró fleiri einstaklinga til dauða það ár.
Þetta er í fyrsta sinn sem Fentanyl er á toppi þessa skelfilega lista en árin 2012 til 2015 var heróín það fíkniefni sem dró flesta til dauða í Bandaríkjunum. Oxycodone var á toppnum árið 2011.
Eins og að framan greinir hafa vinsældir lyfsins farið mjög vaxandi á undanförnum árum. Lyfið er gríðarlega sterkt, margfalt sterkara en morfín og heróín og örlítill skammtur getur dregið fólk til dauða. Árið 2011 mátti rekja fjögur prósent dauðsfalla af völdum of stórs fíkniefnaskammts til Fentanyl en 29 prósent árið 2016.
Á listanum, sem nýlega var birtur, kemur fram að tæplega 16 þúsund manns létust af völdum ofneyslu heróíns og 11 þúsund af völdum kókaíns.