Það mætti halda að ást sem náði langt út fyrir gröf og dauða myndi vara að eilífu, en svo er ekki. Amanda Teage frá Louth á Írlandi gekk að eiga „Jack“ í janúar á þessu ári. Málið er að Jack er draugur 300 ára gamals sjóræningja frá Haíti. Amanda lagði mikið á sig til að giftast honum og sigldi út á alþjóðlegt hafsvæði með fjölskyldu og vinum til að halda brúðkaupið án afskipta yfirvalda. Greint er frá þessu furðulega máli á vef Irish Times.

Amanda byrjaði með Jack árið 2014, hún starfaði þá sem eftirherma sem sérhæfði sig í að leika Jack Sparrow úr kvikmyndunum vinsælu um sjóræningjana í Karíbahafinu. Jack mun hafa átt fimm börn úr fyrri samböndum og var hengdur af Bretum fyrir sjórán. Hún tilkynnti á samfélagsmiðlum, í tengslum við brúðkaupið, að hún væri ekki sátt við að vera aðeins hjásvæfa Jacks og setti honum því afarkosti, giftast sér eða hypja sig aftur út á sjó.

Það er löglegt að giftast draugum víða um heim, þar á meðal í Frakklandi og í Kína en ekki á Írlandi. Þess vegna var brúðkaupið haldið utan við lögsögu Írlands. Jack var „á staðnum“ í gengum sjóræningjafána og fékk Amanda sjálfstæðan miðil til að tala fyrir hönd Jacks í brúðkaupinu til að gestir gætu verið vissir um að það væri í raun hann að tala en ekki bara hún.

Amanda tók skilnaðinn nærri sér en er líka sátt að hafa náð loks að taka skrefið og skilja við drauginn. Hún er alls ekki sú fyrsta til að vera á föstu með draug, hún segir mikla kosti við það, þar á meðal að kynlífið sé mun betra en með lifandi karlmönnum. Þau fóru í brúðkaupsferð á Írlandi áður en þau fluttu inn saman á heimili hennar í Downpatrick. Þau munu hafa farið reglulega í bíó og út að borða.

Amanda hefur nú tilkynnt um sambandsslitin. „Ég skal útskýra þetta í smáatriðum síðar en núna vil ég bara segja við alla: FARIÐ MJÖG VARLEGA í samböndum við fólk að handan, það er ekkert til að leika sér að…“