Fertugur faðir að fær ekki lengur að fara með dóttur sína í ungbarnasund þar sem þremur mæðrum sem játa íslamska trú þótti óþægilegt að hafa hann í hópnum. Ekki þó vegna hegðunar hans heldur þótti þeim óviðeigandi að hafa fullorðinn karlmann nálægt sér við sundkennsluna.
Málið kom upp í hafnarborginni Bremen í norðanverðu Þýskalandi. Tim er fertugur að aldri, giftur og á tvö börn. Fjallað er um málið meðal annars í fréttamiðlunum Bild og Focus. Kemur þar fram að þar sem eiginkona Tims er bundin heima yfir yngra barni þeirra hjóna féll það í hans hlut að fara með eldra barnið, tveggja ára dóttur, í ungbarnasund.
Hann reyndist vera eini faðirinn í hópnum og í fyrstu var honum afar vel tekið. „Konunum fannst frábært að fá loksins karlmann í hópinn,“ segir Tim. En svo bárust kvartanir frá þremur múslimakonum. Stjórnandi sundhópsins sendi honum talskilaboð í tölvupósti þar sem þess var óskað að konan hans myndi mæta hér eftir. Það væru múslímakonur í hópnum og þeim fyndist óþægilegt að hafa karlmann í sundskýlu einni fata nálægt sér.
„Ég fékk að vita að nærveru minnar væri ekki óskað,“ segir Tim og er mjög sár yfir þessu.
Segjast vilja fleiri feður í hópa af þessu tagi
Talsmaður félagsmálayfirvalda í borginni kveðst einnig ósáttur við þetta og segir að gripið verði til aðgerða. David Lukaßen, heitir hann og segir: „Við viljum fleiri feður í foreldrahópana og að fleiri feður mæti í foreldratíma. Að sjálfsögðu eiga þeir að taka þátt í barnastarfi með íslömskum foreldrum. Það sem þarna átti sér stað er alls ekki í samræmi við okkar verklagsreglur.“
Í fréttaskýringu Focus.de á myndbandi kemur fram að málið sé ekki einstakt heldur dæmi um margendurtekna árekstra við heittrúaða múslima í hversdagslífi í Þýskalandi. Þýski lögfræðingurinn og feministinn Seyran Ates, sem er kúrdneskur Tyrki að uppruna, segir að slík öfl séu ekki að fara fram á umburðarlyndi heldur vilji breyta samfélaginu og lífsháttum Þjóðverja.
Sundbannið staðfest
Þess má geta að þrátt fyrir ofangreind ummæli frá talsmanni félagsmálayfirvalda hefur Bild fengið þær upplýsingar að félagsmálayfirvöld álíti að hópurinn hafi verið í fullum rétti að vísa Tim frá þar sem um væri að ræða samverustund mæðra sem sumar væru múslímar.
