Samkvæmt nýrri könnun EuroClinix er töluverður munur á fjölda rekkjunauta fólks af hinum ýmsu kynslóðum. Niðurstöðurnar benda til að það sé rétt sem sumir segja að nýjar kynslóðir verði sífellt frjálslyndari þegar kemur að kynlífi.

Samkvæmt niðurstöðum könnunarinnar hefur fólk, sem er nú 23 til 37 ára, átt 11,6 rekkjunauta að meðaltali fram að þessu. Hjá körlum er meðalfjöldi rekkjunauta 10,8 og hjá konum 13,4.

Kynslóðin, sem er nú á aldrinum 38 til 53 ára, hefur að meðaltali átt 13,1 rekkjunaut. Hjá körlum er meðaltalið 16,1 rekkjunautur en hjá konum er það 10,1.

Kynslóðin, sem er fædd eftir 1995, hefur nú þegar átt 5,6 rekkjunauta að meðaltali. Hjá körlunum er meðaltalið 7,6 rekkjunautar en hjá konunum er það 2,6.

Þrátt fyrir að fjöldi rekkjunauta virðist fara fjölgandi hjá hverri kynslóð þá hafa hugmyndir fólks um hæfilegan fjölda rekkjunauta ekki breyst að því er segir í umfjöllun Daily Mail. Samkvæmt könnun sem IllicitEncouters.com vefsíðan gerði voru bæði kynin sammála um að 12 rekkjunautar væri hinn fullkomni fjöldi rekkjunauta. Fólk sagði að þessi fjöldi rekkjunauta sýndi að fólk væri „ævintýragjarnt í kynlífi og frjálslynt“. Þeir sem hafa átt færri en 10 rekkjunauta eru hins vegar sagðir „of íhaldssamir“ og „óreyndir í kynlífi“.