Hjónin Keith og Jacquelyn Smith voru á ferðinni í Baltimore í Bandaríkjunum á laugardagsmorgun ásamt dóttur sinni. Þremenningarnir höfðu verið í afmæli og voru á leið heim til sín þegar Keith stöðvaði bifreið sína á rauðu ljósi.

Fyrir utan bílinn stóð ung kona, sem virtist halda á nýfæddu barni, með skilti með skilaboðum þess efnis að hún ætti ekki pening til að fæða barn sitt. Jacquelyn skrúfaði niður bílrúðuna til að gefa ungu konunni pening en í þann mund kom karlmaður aðvífandi sem reyndi að hrifsa veskið úr höndum Jacquelyn.

Til átaka kom í kjölfarið sem endaði með því að maðurinn stakk Jacquelyn í kviðinn. Árásarmaðurinn og konan sem Jacquelyn hugðist hjálpa hlupu svo á brott. Keith ók rakleitt á sjúkrahús en það var of seint. Jacquelyn var úrskurðuð látin fljótlega eftir komuna þangað.

Lögregla leitar enn að fólkinu sem grunað er um voðaverkið.

Jacquelyn var 54 ára og lætur hún eftir sig tvo syni og stjúpdóttur sem var með þeim hjónum í bílnum þegar atvikið varð.