Leikvellir eiga að vera örugg svæði fyrir börn þar sem þau geta leikið sér og skemmt áhyggjulaus. En á leikvellinum Skovfogedvænget í Frederiksværk í Danmörku hefði getað farið illa ef árvökull borgari hefði ekki tekið eftir hlut sem ekki átti að vera á leikvellinum.

Hann sá að búið var að líma hnífsblað fast á rennibraut með sílikoni. Hnífsblaðið var einmitt á þeim stað þar sem börnin setja hendurnar yfirleitt þegar þau nota rennibraut. Auk þess var búið að setja mikið af sílikoni á rennibrautina.

Lögreglunni var að sjálfsögðu tilkynnt um málið og rannsakar hún það nú. Ekki þarf að efast um að alvarlegt slys hefði getað orðið ef barn hefði sest í rennibrautina og lent á hnífsblaðinu.