Juan David Ortiz, 35 ára karlmaður í Bandaríkjunum, á yfir höfði sér dauðadóm verði hann sakfelldur fyrir morð á fjórum konum sem hann er grunaður um.
Ortiz þessi starfaði sem landamæravörður en hann er grunaður um að hafa rænt fjórum konum og myrt þær. Þetta gerði hann á skipulagðan hátt.
Ortiz var handtekinn í landamæraborginni Laredo þann 15. september síðastliðinn og segir NBC News að saksóknarar muni fara fram á dauðarefsingu yfir honum. Við yfirheyrslur er hann sagður hafa játað morðin og sagst hafa viljað „hreinsa götur“ Laredo.
Morðin er hann sagður hafa framið á tveggja vikna tímabili í byrjun septembermánaðar, en fórnarlömb hans störfuðu í kynlífsiðnaði eða voru í stífri eiturlyfjaneyslu. Konurnar sem hann myrti voru á aldrinum 28 til 42 ára.