Tveir ungir drengir, sem eru taldir vera um 10 ára, hneyksluðu áhorfendur á úrslitaleik Levski Sofia og Slavia PFC í búlgörsku bikarkeppninni í knattspyrnu nýlega. Drengirnir mættu á þjóðarleikvang Búlgaríu berir að ofan. Á maga annars var búið að mála hakakross en á maga hins var búið að mála slagorð ofbeldisfullra áhangenda Levski Sofia. Drengirnir stóðu síðan fyrir framan stóran hóp stuðningsmanna Levski Sofia og heilsuðu að nasistasið.

Sofiaglobe skýrir frá þessu auk nokkurra annarra fjölmiðla. Rasismi og nasistaáróður er útbreitt vandamál meðal stuðningsmanna Levski Sofia. En nú þykir áróðurinn hafa náð nýjum hæðum eða kannski frekar lægðum þegar byrjað er að láta börn breiða út boðskapinn.

Búlgörsk samtök, sem berjast fyrir verndun barna, ætla nú að reyna að bera kennsl á drengina. Ef í ljós kemur að þeir hafi komið á völlinn með fullorðnum mega foreldrar þeirra eiga von á sekt þar sem leikurinn var að kvöldi til og börn yngri en 14 ára verða að vera í fylgd með fullorðnum eftir klukkan 20.

Stefka Ilieva, starfsmaður samtakanna, segir að nasistakveðjurnar veki einnig áhyggjur. Ef upplýsingar fáist um hverjir drengirnir eru og hvar þeir eiga heima verði félagsmálayfirvöldum afhentar þær upplýsingar.