Rússnesk yfirvöld saka Breta um að halda Skripal-feðginunum föngnum gegn vilja þeirra og benda á að Sergei Skripal sé rússneskur ríkisborgari. Eitrað var fyrir Skripal-feðginunum í Salisbury í mars. Feðginin hafa hafnað allri aðstoð rússneskra yfirvalda vegna málsins enda eru þau væntanlega sama sinnis og bresk stjórnvöld um að það hafi verið rússnesk yfirvöld sem stóðu á bak við banatilræðið.

Sky segir að talskona rússneska utanríkisráðuneytisins, Maria Zakharova, hafi sagt að Skripal-feðginunum sé haldið gegn vilja þeirra í Bretlandi. Hún lagði einnig áherslu á að Sergei væri rússneskur ríkisborgari þrátt fyrir að hann hafi leitað hælis í Bretlandi þegar upp komst að hann hafði svikið rússnesku leyniþjónustuna og starfað fyrir þá bresku.

Zakharova sagði að rússnesk yfirvöld telji að reynt hafi verið að ráða rússneskan ríkisborgar af dögum og í kjölfarið hafi miklar pólitískar ögranir hafist. Sönnunarbyrðin liggi hjá Bretum í þessu máli. Bretar segi að feðginin hafni allri rússneskri aðstoð og að rússnesk stjórnvöld vilji sjá sannanir þess efnis og gjarnan heyra feðginin segja það.

Novichok taugaeitur var notað til að eitra fyrir feðginunum sem lifðu árásina af, þvert á allar líkur en eitrið er eitt það banvænasta sem til er.