Óhætt er að segja að óhugnanleg sjón hafi mætt móður fimm ára stúlku í Colorado um helgina. Forsaga málsins er sú að stúlkan hafði vaknað um miðja nótt vegna hávaða fyrir utan heimili fjölskyldunnar í East Orchard Mesa.
Stúlkan, Kimberly Cyr, taldi að heimilishundurinn væri eitthvað að brasa fyrir utan en svo reyndist ekki vera. Örstuttu síðar vaknaði móðir stúlkunnar við neyðaróp frá dótturinni og þegar henni var litið út um gluggann sá hún dótturina í gini bjarndýrs. Virtist bjarndýrið vera að gera sig líklegt til að draga stúlkuna burt.
Móðir stúlkunnar sagði við NBC 11 að hún hafi hlaupið út og öskrað á bjarndýrið sem reyndist vera stór og stæðilegur svartbjörn. Björninn forðaði sér þegar móðir stúlkunnar kom út.
Kimberly var flutt alvarlega slösuð á sjúkrahús og þurftu læknar að sauma 77 spor í hana, meðal annars í höfuð. Sem betur fer eru áverkar hennar ekki lífshættulegir og er stúlkan við ágæta heilsu eftir árásina um helgina.
Leit stendur yfir að bjarndýrinu og hefur gildra verið lögð fyrir það.
