Það hefur aldrei verið auðveldara að skipuleggja eigin ferðalög en nú enda er hægt að afla sér nærri allra nauðsynlegra upplýsinga á netinu. Nánast hvert hótelherbergi er auglýst á einhverri bókunarsíðu. Þar birta hótelin fallegar myndir af hótelinu, aðbúnaði og umhverfinu. En stundum fara menn aðeins framúr sjálfum sér og „fegra“ myndirnar aðeins of mikið.

Þetta fékk hin breska Jenny Kershaw að reyna á eigin skinni nýlega. Hún var á ferðalagi í Víetnam og hafði bókað herbergi á Mari Gold Hotel og Apartment í Da Nang í gegnum bókunarsíðuna booking.com.

Nýlega birti hún mynd á Twitter með yfirskriftinni: Booking.com og raunveruleikinn. Þar bar hún saman myndina af sundlaug hótelsins, sem var birt á vef booking.com, og hvernig sundlaugin leit út fyrir henni þegar hún var mætt á staðinn.

Tugir þúsunda notenda hafa séð færslu hennar og margir hafa skemmt sér vel yfir henni eða öllu heldur myndunum.

Starfsfólk booking.com hefur einnig séð færsluna og sett sig í samband við Kerchaw og beðið hana að senda kvörtun til þeirra. Í samtali við The Sun sagði hún að hún ætli ekki að senda kvörtun til booking.com, henni hafi einfaldlega fundist þetta fyndið.

Myndin sem var á vef booking.com er nú horfin þaðan og í staðinn er komin ný mynd af sundlauginni sem er nú nefnd heitur pottur í staðinn.