Heimurinn getur verið grimmur eins og hann getur verið fallegur. Því hafa Azita Milanian og Matthew Whitaker bæði fengið að kynnast.
Fyrir tuttugu árum var Azita úti að skokka í Altadena í Kaliforníu með tvo hunda sína þegar annar hundurinn byrjaði að gramsa í jarðveginum skammt frá. Azitu varð litið til hliðar og þá mætti henni óhugnanleg sjón. Tveir agnarsmáir fætur stóðu upp úr moldinni og varð Azitu strax ljóst að þarna væri lítið barn grafið.
Azita hófst strax handa við að grafa barnið upp og þegar það tókst kannaði hún lífsmörk barnsins sem reyndist vera lítill drengur. Ljóst var að hann var á milli heims og helju. Búið var að vefja litla drenginn í teppi og var naflastrengurinn enn fastur á honum. Azita hreinsaði moldina frá andliti hans og grátbað hann um að deyja ekki. „Hann greip í höndina á mér og hætti að gráta um leið.“
Azita hafði strax samband við neyðarlínuna og var drengurinn fluttur á sjúkrahús. Líkamshiti hans var kominn niður í 26,6 gráður. Sem betur fer – og kannski þótt ótrúlegt megi virðast – komst Matthew litli til heilsu eftir nokkurra vikna dvöl á sjúkrahúsi.
Azita íhugaði að ættleiða litla snáðann en hugsaði með sér að þar sem hún hefði verið í fréttum vegna málsins væri hætta á að blóðforeldrar hans myndu reyna að hafa upp á honum aftur. Svo fór að Whitaker var að ættleiddur til góðrar fjölskyldu.
Undanfarin tuttugu ár hefur Azita oft velt fyrir sér hvað varð um litla snáðann sem hún bjargaði þennan örlagaríka dag árið 1998. Hún reyndi oft að hafa upp á honum en án árangurs. Eftir að hann var ættleiddur fékk hún þau skilaboð frá félagsmálayfirvöldum að hún gæti ekki fengið upplýsingar um nýju fjölskylduna. Azita var nánast búin að gefa upp alla von um að finna drenginn. En kraftaverkin gerast enn.
Ekki alls fyrir löngu heyrði starfsmaður þáttar, On Air with Ryan Seacrest, sögu Whitakers. Hann ákvað að reyna að sameina Azitu og Whitaker og það tókst að lokum, tuttugu árum síðar. Azita og Whitaker hittust á dögunum og er óhætt að segja að þar hafi orðið miklir fagnaðarfundir. Tárin streymdu niður kinnar Azitu þegar hún sá Whitaker, stóran og mikinn mann sem var svo lítill síðast þegar hún sá hann.
Í þættinum heimsóttu Azita og Whitaker staðinn sem Whitaker fannst á. „Þetta hefði getað verið gröfin mín,“ segir Whitaker meðal annars í þættinum.
Whitaker var sautján ára þegar hann fékk að vita að hann væri ættleiddur. Það var svo á síðasta ári að hann fékk að heyra alla söguna um hvað gerðist þegar hann fæddist. „Ég er hér í dag, ég hef átt gott líf og var ættleiddur til frábærrar fjölskyldu. Ég gæti ekki beðið um neitt meira.“
