Sænska lögreglan leitar nú logandi ljósi að Lena Wesström, 45 ára þriggja barna móður og presti, sem hvarf frá heimili sínu í Örebro aðfaranótt 15. maí. Síðast heyrðist frá henni um klukkan 23 kvöldið áður. Wesström býr í raðhúsi í rólegu hverfi í Örebro. Expressen segir að lögreglan telji að hvarf hennar hafi borið að með glæpsamlegum hætti.

Aftonbladet segir að það hafi verið á þriðjudagsmorguninn sem ættingjar Wesström uppgötvuðu að hún var horfin. Allar eigur hennar voru í húsinu hennar en útidyrnar stóðu opnar. Lögreglan hóf strax leit að henni og vann frá upphafi út frá þeirri kenningu að Wesström hefði verið rænt.

Farsími hennar hefur verið staðsettur nærri heimili hennar út frá gögnum frá símafyrirtækjum en hefur ekki fundist.

Lögreglan ákvað að birta nafn Wesström í gær og mynd í fjölmiðlum í þeirri von að almenningur geti komið með upplýsingar sem gagnast við rannsókn málsins.

Wesström er sögð vera dugleg móðir unglinga, hún var prestur í fríkirkju fyrir nokkrum árum en hefur starfað með flóttamönnum undanfarið, hún er virk á samfélagsmiðlum og hefur áhuga á líkamsrækt og útiveru.

Expressen segir að lögregluna gruni að öfundsýka vegna ástarmáli geti legið að baki hvarfi Wesström. Einn var handtekinn fyrr í vikunni vegna málsins en var látinn laus skömmu síðar.