Það getur verið óþægilegt og oft óvænt þegar flass hraðamyndavélar skellur á ökumönnum. Margir hafa því reynt fyrir sér með margskonar aðferðir til að losna við að lenda á þessum dýru ljósmyndum, húfur, grímur, engar númeraplötur nú eða það sem virkar langbest: Að aka ekki hraðar en leyfilegt er.

Miðað við reikninginn sem belgískur ökumaður fékk nýlega þá hafði hann gert tilraun með nýja aðferð til að losna við að lenda á mynd. Hann var á ferð nærri landamærunum við Frakkland og þar ók hann svo hratt að hraðamyndavél náði ekki að festa hann né Opel Astra bíl hans á filmu.

Í sektarboðinu kom fram að hann hefði ekið á 696 km/klst þar sem leyfður hámarkshraði er 50 km/klst. Fyrir þetta fékk hann sekt upp á sem nemur um 900.000 íslenskum krónum.

Þetta kemur fram í innleggi á Facebooksíðunni Perles Rares de Belgique.

Ekki kemur fram hvernig vél er í Astra bíl mannsins en öflugasti bíll þessarar tegundar nær 235 km/klst. Eigandinn hefði því eiginlega þurft að setja þotuhreyfil í bílinn til að koma honum í tæplega 700 km/klst.

Það þarf ekki að undra að maðurinn kvartaði yfir sektinni og yfirvöld játuðu að um mistök væri að ræða. En maðurinn hafði ekið of hratt eða á 60 km/klst þar sem má aka á 50 km/klst. Hann fékk sekt fyrir það en hún var öllu lægri eða sem nemur tæplega 5.000 íslenskum krónum.