Í gær voru níu nemendur og einn kennari myrtir í menntaskóla í Santa Fe í Texas í Bandaríkjunum. Á miðvikudaginn kom lögreglumaður í veg fyrir fjöldamorð í skóla í Dixon í Illinois þegar hann skaut árásarmanninn. Í síðustu viku var skotárás gerð í skóla í Palmdale í Kaliforníu. Í apríl voru þrjár skotárásir til viðbótar í skólum, í mars voru þær fimm, í febrúar fimm og fjórar í janúar. Fæstar þeirra vöktu mikla athygli.

Þar sem af er ári hafa 31 misst lífið í skotárásum í bandarískum skólum. Flestir létust í árás í skóla í Parkland í Flórída í febrúar en þá voru 17 myrtir. Samkvæmt samantekt Washington Post þá hafa fleiri verið myrtir í bandarískum skólum það sem af er ári en hafa látið lífið við herþjónustu. Líklegast er þetta undantekningartilfelli því á sama tíma á síðasta ári var þessu öfugt farið og fallnir hermenn voru miklu fleiri.

Skotárásum í bandarískum skólum fer fjölgandi og virðast ekki ætla neinn endi að taka.

Umræðan um málin er erfið og við ramman reip að draga í að knýja fram breytingar á skotvopnalöggjöfinni því áhrif NRA, helstu samtaka skotvopnaeigenda, eru mikil og flestir þingmenn repúblikana eru á móti hertri löggjöf. Hugsanlega hefur það áhrif að NRA styrkir kosningasjóði þeirra yfirleitt rausnarlega. Það er því vandséð að nokkuð muni breytast á næstunni nema aldamótakynslóðinni takist að knýja fram breytingar en hún virðist vera með allt önnur viðhorf til skotvopnamálanna en þeir sem fara með pólitísk völd í landinu nú um stundir.