5,8 milljón afbrot voru skráð hjá lögreglunni á síðasta ári. Þetta er 5 prósenta fækkun frá 2016. Fækkun á við á flestum sviðum, allt frá töskuþjófnuðum til grófra rána og ofbeldisverka. Hvað varðar nauðganir og önnur kynferðisbrot er staðan önnur því þar fjölgaði skráningum úr 7.919 árið 2016 í 11.282 á síðasta ári. Lögreglan bendir þó á að ekki sé hægt að bera árin saman því lög um kynferðisbrot hafi verið hert á milli ára og viðmiðin því önnur.
Af þeim sem voru kærðir fyrir lögbrot voru 34,8 prósent útlendingar. Þetta er töluverð fækkun frá 2016 en þá voru útlendingar 40,8 prósent þeirra sem voru kærðir. Það eru því góð tíðindi að útlendingum hefur fækkað en þeir eru þó enn alltof margir miðað við hlutfall þeirra af íbúum landsins. Útlendingar eru 12 prósent íbúa Þýskalands og því eru þeir enn miklu fyrirferðarmeiri í tölfræðinni en þeir ættu að vera.
Útlendingar voru 41 prósent þeirra sem voru handteknir vegna þjófnaðarmála, 37 prósent grunaðra í nauðgunarmálum og grófum ofbeldismálum, 42 prósent af grunuðum morðingjum og 26 prósent handtekinna í fíkniefnamálum.
Ef litið er framhjá tölum um kynferðisbrot, sem eru ekki samanburðarhæfar á milli ára vegna lagabreytinga, sést að flóttamannastraumurinn 2015 varð ekki til þess að glæpum fjölgaði.
Lögreglunni tókst að upplýsa 58 prósent þeirra brotamála sem komu inn á hennar borð. En þessi ágæti árangur lögreglunnar og fækkun glæpa hefur ekki orðið til þess að landsmönnum finnist þeir öruggari. Kannanir sýna að þeim finnist þvert á móti sem glæpum fari fjölgandi. Þetta er skýrt með að myndir af glæpum og slysum eru oft birtar á samfélagsmiðlum og ýti því oft undir tilfinningar fólks og hugmyndir.