Það er líklega engum ofsögum sagt að bíleiganda einum í Michigan í Bandaríkjunum hafi brugðið þegar honum var litið í skottið á bifreið sinni á dögunum.

Forsaga málsins er sú að bifreið mannsins, Toyota Camry, var dregin af lóð einni um helgina eftir að tilkynnt var að henni hafði verið lagt ólöglega – á einkalóð þar sem ekki mátti leggja.

Það var svo í gær að eigandi bifreiðarinnar vitjaði hennar. Þegar honum var litið í skottið fann hann lík karlmanns sem síðar reyndist vera hinn 43 ára gamli Diabulo White. Lögregla hefur málið nú til rannsóknar og hefur enn sem komið er ekki tekist að finna nein tengsl milli White og bíleigandans.

Lögregla handtók aftur á móti annan karlmann um helgina og rannsakar lögregla nú hvort hann hafi átt þátt í dauða mannsins sem fannst í skottinu. Rannsókn lögreglu á vettvangi leiddi í ljós að White hafði verið myrtur þar sem skotsár fundust á líkinu.