Gunnhildur fann skyndilega skrýtna reykjarlykt í íbúðinni. Þegar hún kíkti fram af svölunum sá hún ljósan reyk leggja frá íbúð nágranna síns. Hún fór því niður og bankaði hjá honum. Í samtali við Eskilstuna-Kuriren sagði hún að hún hafi fundið að hurðin var heit. Hún hafi því kíkt inn í gegnum bréfalúguna og séð mikinn reyk.
Hún hélt því áfram að banka þar til nágranninn opnaði loksins. Þá fyrst áttaði hann sig á að hann var í íbúð þar sem eldur var laus. Gunnhildur sagði honum að hringja í 112. Á leið upp í íbúð sína hringdi hún hjá öllum íbúunum og lét þá vita að eldur væri laus í húsinu.
Þegar Gunnhildur fór niður til nágrannans var enginn reykur í stigaganginum. Þegar hún kom aftur upp í íbúðina sína nokkrum mínútum síðar var stigagangurinn fullur af svörtum reyk. Þetta gerðist á aðeins 1-2 mínútum að sögn Gunnhildar.
Lögðust á gólfið
Gunnhildur, eiginkona hennar og dóttir þeirra lögðust á gólfið í svefnherbergi annarrar dótturinnar en þar var minnsti reykurinn.
„Dóttir mín öskraði bara, ég dey, ég dey. Ég hélt henni niðri við gólfið og hugsaði með mér að kannski gæti ég bundið eitthvað um hana miðja og látið hana síga niður af svölunum.“
Sem betur fer slasaðist enginn alvarlega í eldsvoðanum og enginn lést. 70 manns þurftu að yfirgefa húsið eða var bjargað úr því af slökkviliðsmönnum. 11 voru fluttir á sjúkrahús. Gunnhildur og fjölskylda hennar voru meðal þeirra sem slökkviliðsmenn björguðu út. Þær voru lagðar inn á sjúkrahús en voru að vonast til að vera útskrifaðar í dag.
Þær vita ekki hvar þær geta búið næstu vikurnar, íbúð þeirra er illa farin af völdum reyks og sóts og ekki íbúðarhæf.