Aaron Schlossberg, lögfræðingur í New York sem náðist á myndband úthúða starfsfólki veitingastaðar, hefur loks stigið fram og beðist afsökunar á hegðun sinni.
Starfsfólkið – og raunar einnig einhverjir kúnnar sem urðu fyrir svívirðingunum á umræddum veitingastað – hafði það eitt sér til saka unnið, ef svo má segja, að tala saman á spænsku en ekki ensku. Það fór virkilega í taugarnar á Schlossberg.
Í myndbandinu sést Aaron henda því fram að líklega sé um að ræða ólöglega innflytjendur, næsta skref fyrir hann sé að hringja í útlendingaeftirlitið og láta „henda fólkinu úr landinu mínu“ eins og hann orðar það.
„Ef þetta fólk hefur nógu mikinn kjark til að koma hingað og lifa á peningunum mínum – ég borga heilbrigðisþjónustuna fyrir þetta fólk – þá er það minnsta sem það getur gert að tala ensku,“ segir hann.
Atvikið átti sér stað á veitingastaðnum Fresh Kitchen á Manhattan og hafa að minnsta kosti sjö milljónir manna horft á myndbandið af manninum. Borgarstjóri New York, Bill de Blasio, sá ástæðu til að tjá sig um myndbandið og sagði hann að fjölbreytileiki væri einn af styrkleikum New York-borgar. „Þær 8,6 milljónir manna sem kalla New York sína heimaborg tala meira en 200 tungumál – þetta eru allt New York-búar og þeir eru allir velkomnir hér.“
Nú, nokkrum dögum eftir að myndbandið leit dagsins ljós, hefur Aaron loks stigið fram og beðist afsökunar á framferði sínu. Það gerði hann á Twitter þar sem hann sagði að myndbandið af honum hefði fengið hann til að opna augun.
„Það hvernig ég tjáði mig er óásættanlegt og þetta er ekki manneskjan sem ég er. Ég sé að orð mín og gjörðir særðu fólk og á því biðst ég velvirðingar,“ sagði hann í færslunni en tók sérstaklega fram að hann væri ekki rasisti. Ein af ástæðunum fyrir því að hann flutti til New York hafi verið fjölbreytileikinn sem hann kveðst fagna.